2026-cı ildə Azərbaycanda orta aylıq pensiyanın 590 manata, yaşa görə orta aylıq pensiyanın isə 629 manata yüksəlməsi gözlənilir.
Bu barədə Əmək və Əhalinin Sosial Müdafiəsi naziri Anar Əliyev məlumat verib.
Nazirin sözlərinə görə, 2026-cı ildə pensiyaların təqribən 9 faiz artırılması nəzərdə tutulur. Bu məqsədlə dövlət büdcəsindən əlavə 636 milyon manat vəsaitin ayrılması planlaşdırılır.
Anar Əliyev bildirib ki, pensiya artımı 1,1 milyon vətəndaşı əhatə edəcək:
“Pensiyaların indeksləşdirilməsi Dövlət Statistika Komitəsi tərəfindən elan edilən əvvəlki il üzrə orta aylıq əməkhaqqının artım tempinə uyğun aparılır. Komitə rəsmi rəqəmləri açıqladıqdan sonra indeksasiya məbləği tam dəqiq müəyyənləşdiriləcək”.
Nazir vurğulayıb ki, bu addımlar əhalinin sosial rifahının yüksəldilməsinə və pensiya təminatının gücləndirilməsinə xidmət edir.