“Fənərbaxça” klubunun prezidenti Sadettin Saran son günlər ictimai müzakirələrə səbəb olan narkotik istintaqı və klubun gələcəyi ilə bağlı gözlənilən açıqlama ilə çıxış edib.
Realmedia xəbər verir ki, İstanbul Respublika Baş Prokurorluğu tərəfindən aparılan istintaq çərçivəsində iki dəfə ifadə verən və məhkəmə nəzarəti şərti ilə sərbəst buraxılan klub rəhbəri növbədənkənar seçki qərarı aldıqlarını bəyan edib.
Sadettin Saran FB TV-yə müsahibəsində bildirib ki, prezidentlik fəaliyyəti dövründə ictimai açıqlamalarda ehtiyatlı davranmağa üstünlük verib:
“Vəzifə müddətim ərzində danışmağı sevən prezident olmadım. Xüsusilə şəxsimlə bağlı mövzularda arxa planda qalmağa çalışdım. Lakin gəlinən mərhələdə mövqeyimi sakit və aydın şəkildə izah etməyin vaxtı çatıb. Prezidentlik vəzifəmizi mövsümün sonuna qədər davam etdirəcəyik, daha sonra isə klubumuzu Növbədənkənar Ümumi Yığıncağa (Konqresə) aparacağıq”, – deyə o qeyd edib.
Məlumata görə, “Fənərbaxça” klubunda seçkili ümumi yığıncaq may ayında keçiriləcək. Sadettin Saranın yenidən prezidentliyə namizəd olub-olmayacağı isə seçki tarixinə yaxın dəqiqləşəcək.
Xatırladaq ki, Sadettin Saran narkotik istintaqı çərçivəsində şübhəli şəxs qismində məhkəməyə çağırılıb. Məhkəmə Tibbi Ekspertizasında ondan saç və qan nümunələri götürülüb. İlkin məlumatlara əsasən, saç nümunəsində kokain testinin nəticəsi pozitiv çıxıb. Saran bu nəticəni qəbul etməyərək özəl laboratoriyada təkrar analiz versə də, nəticənin yenidən pozitiv olduğu bildirilib. Bundan sonra o, məhkəmə nəzarəti şərti ilə sərbəst buraxılıb.