Gürcüstanın Batumi şəhərində keçirilən döyüş idmanları üzrə beynəlxalq turnirdə azərbaycanlı idmançılar uğurla çıxış edirlər.

Realmedia.info xəbər verir ki, yarış Georgian Fighting Championship (GFC) və Grand Bellagio Championship-in birgə təşkilatçılığı ilə təşkil olunub. Döyüş gecəsi yerli vaxtla saat 20:00-da başlayıb.

Turnir çərçivəsində müxtəlif çəki dərəcələrində ümumilikdə 10 qarşılaşma nəzərdə tutulub. Yarışda Azərbaycanla yanaşı, Gürcüstan, Özbəkistan, Portuqaliya, Türkiyə, İsrail, Braziliya, Qazaxıstan və İsveçdən olan idmançılar iştirak edirlər.

Gecənin üçüncü döyüşündə Sandro Datanaşvili ilə azərbaycanlı idmançı Elvin Kamilli qarşılaşıb. Döyüşdə Kamilli rəqibini məğlub edərək Azərbaycan komandasına qələbə qazandırıb.

Turnirdə Azərbaycanı ümumilikdə üç idmançı təmsil edir. Kikboksinq üzrə 7 qat dünya və 3 qat Avropa çempionu Alim Nəbiyevin braziliyalı rəqibi ilə döyüşü də proqramda yer alır və bu qarşılaşma böyük maraqla gözlənilir.

Azərbaycanı təmsil edən digər idmançı isə 27 yaşlı Tural Əsgərovdur. O, indiyədək keçirdiyi döyüşlərdə 4 qələbə və 3 məğlubiyyət əldə edib. Tural Əsgərov “Ruslan” klubunun üzvüdür və Bakı şəhərini təmsil edir.

Qeyd edək ki, tədbiri izləmək üçün Azərbaycandan tanınmış idmançılar, məşqçilər, həmçinin Azərbaycanın Gürcüstandakı səfirliyi və konsulluğunun nümayəndələri Batumi şəhərinə səfər ediblər.
Turnir hazırda davam edir.