Paytaxtın Nəsimi rayonu ərazisində su sayğaclarının və digər əşyaların oğurlanması ilə bağlı polisə müraciət daxil olub.
Daxili İşlər Nazirliyinin mətbuat xidmətindən verilən məlumata görə, vətəndaşlardan biri ona məxsus mağazadan oğurluq edilməsi barədə polisə məlumat verib. Nəsimi Rayon Polis İdarəsinin 20-ci Polis Şöbəsinin əməkdaşlarının həyata keçirdikləri tədbirlər nəticəsində əməli törətməkdə şübhəli bilinən 58 yaşlı İ.Səfərli müəyyən olunaraq saxlanılıb.
Araşdırmalarla onun gecə saatlarında mağazanın qapısının açıq qalmasından istifadə edərək obyektə daxil olduğu və oğurluq etdiyi müəyyən edilib.
Bundan əlavə, analoji hadisə Nərimanov rayonu ərazisində də qeydə alınıb. Belə ki, zərərçəkənlər su sayğaclarının oğurlanması barədə polisə müraciət ediblər.
Nərimanov Rayon Polis İdarəsinin 17-ci Polis Şöbəsinin əməkdaşları tərəfindən keçirilən tədbirlərlə sayğacları oğurlamaqda şübhəli bilinən T.Məmmədov saxlanılıb.
Faktlarla bağlı araşdırmalar davam etdirilir.