Qara Dənizdə Xəzər Boru Xətti Konsorsiumunun (CPC) neft yükləmə terminalı yaxınlığında iki neft tankerinə pilotsuz uçuş aparatları (dronlar) ilə hücum edilib.
Məlumata görə, hadisə tankerlərin CPC terminalı ərazisində neft yükləmək üçün gözlədiyi vaxt baş verib. Hücuma məruz qalan gəmilərdən birində partlayış qeydə alınsa da, yanğın baş verməyib. İlkin məlumatlara əsasən, ekipaj üzvləri arasında xəsarət alan olmayıb.
Bildirilir ki, hər iki tanker üzmə qabiliyyətini saxlayıb və ciddi struktur zədəsi qeydə alınmayıb. Hadisədən sonra təhlükəsizlik tədbirləri gücləndirilib, məsələ ilə bağlı araşdırma aparılır.
Qeyd edək ki, Xəzər Boru Xətti Konsorsiumu Qazaxıstan neftinin Qara Dəniz vasitəsilə dünya bazarlarına çıxarılmasında mühüm rol oynayır. Son dövrlər regionda enerji infrastrukturu və neft daşımaları ilə bağlı təhlükəsizlik risklərinin artması diqqət çəkir.