Astronomlar TOI-561 b adlı ekzoplanetlə bağlı diqqətçəkən nəticələr əldə ediblər. Süd yolu qalaktikasının ən qədim bölgələrindən birində yerləşən bu planetin milyardlarla il ərzində atmosferini qoruyub saxladığı müəyyən edilib.

Realmedia xəbər verir ki, bu barədə Ceyms Uebb Kosmik Teleskopu (JWST) vasitəsilə aparılan son müşahidələrdə bildirilib. Alimlərin sözlərinə görə, planet öz ulduzuna son dərəcə yaxın olmasına və amansız istilik şəraitində yerləşməsinə baxmayaraq, atmosferini itirməyib.

Qeyd edək ki, Günəş sistemindən təxminən 280 işıq ili uzaqlıqda yerləşən TOI-561 b öz ulduzuna o qədər yaxındır ki, planetdə bir il cəmi 10,5–11 saat davam edir. Bu da onu ən qısa orbital dövrə malik ekzoplanetlərdən birinə çevirir.

Mütəxəssislər bu kəşfin ekzoplanetlərin təkamülü və atmosferlərin uzunmüddətli sabitliyi ilə bağlı elmi təsəvvürlərə mühüm töhfə verdiyini bildirirlər.