İranla əlaqələrdə gərginliyin artması fonunda İordaniya ərazisində ABŞ hərbi təyyarələrinin sayı əhəmiyyətli şəkildə yüksəlib. Realmedia.info-nun məlumatına görə, "The New York Times" peyk görüntüləri və uçuş məlumatlarına istinadən xəbər yayıb.

Jurnalistlərin bildirdiyinə görə, ABŞ aviasiya qruplaşmasının yerləşdirilməsi “Muvaffak Salti” hərbi bazasında qeydə alınıb. Nəşr yazır ki, baza ABŞ hərbçiləri tərəfindən İrana mümkün zərbələrin planlaşdırılması üçün əsas mərkəzə çevrilib.

Peyk görüntülərində 60-dan çox təyyarə aşkar edilib ki, bu da baza üçün adi mövcudluq səviyyəsindən üç dəfə çoxdur. Uçuşların izlənməsi məlumatları göstərir ki, fevralın 15-dən bəri bazaya ən azı 68 nəqliyyat təyyarəsi eniş edib.

Müəlliflər ehtimal edirlər ki, əlavə qırıcı təyyarələrin bir hissəsi sığınacaqlarda yerləşdirilib. Fotoşəkillərdə həmçinin “F-35” qırıcıları, bir neçə PUA (pilotsuz uçuş aparatı), helikopterlər və yeni hava hücumundan müdafiə sistemləri görünür.

İordaniya məmurları bildiriblər ki, bu texnikanın yerləşdirilməsi Vaşinqtonla ikitərəfli müdafiə müqaviləsi çərçivəsində həyata keçirilir.