ABŞ Hərbi Dəniz Qüvvələri Yaxın Şərq regionunda artan gərginlik fonunda bölgəyə əlavə hərbi gəmi göndərib.
Məlumata görə, ABŞ donanmasına məxsus güdümlü raketlərlə təchiz olunmuş destroyer Yaxın Şərq sularına daxil olub. Rəsmi Vaşinqton bu addımın regionda təhlükəsizliyin təmin edilməsi, ABŞ və müttəfiq qüvvələrin qorunması məqsədi daşıdığını bildirib.

ABŞ rəsmiləri qeyd ediblər ki, hazırda Yaxın Şərqdə ABŞ Hərbi Dəniz Qüvvələrinə məxsus bir neçə destroyer, aviadaşıyan gəmi qrupu və digər hərbi gəmilər fəaliyyət göstərir. Yeni göndərilən gəmi bu hərbi mövcudluğu daha da gücləndirir.

Ekspertlərin fikrincə, ABŞ-ın bölgədə hərbi qüvvələrini artırması İranla münasibətlərdə gərginliyin yüksəlməsi və regional təhlükəsizlik riskləri ilə birbaşa əlaqəlidir. Mövcud vəziyyət Yaxın Şərqdə hərbi-siyasi balansın daha da həssas mərhələyə keçdiyini göstərir.

Qeyd edək ki, son aylarda regionda baş verən proseslər beynəlxalq ictimaiyyətin diqqət mərkəzindədir və böyük güclər arasında qarşıdurma ehtimalı müzakirə mövzusu olaraq qalır.