"Vətənə Xidmət" İctimai Birliyinin sədri Əziz İsmayılov bildirib ki, vətənə xidmət hər bir Azərbaycan vətəndaşının müqəddəs borcudur. Onun sözlərinə görə, dövlətçilik prinsiplərinə sadiqlik, milli-mənəvi dəyərlərin qorunması və gənc nəslin vətənpərvərlik ruhunda tərbiyə olunması fəaliyyətinin əsas istiqamətlərindəndir.

Əziz İsmayılov qeyd edib ki, müxtəlif sahələrdə qazandığı təcrübəni bu gün cəmiyyətə fayda vermək istiqamətində istifadə etməyə çalışır. O, Azərbaycanın inkişafını və dövlətimizin daha da güclənməsini hər zaman dəstəklədiyini vurğulayıb.

Birlik sədri bildirib ki, 2008-ci ildə Yeni Azərbaycan Partiyasına üzv olub və Azərbaycan Respublikasının Prezidenti İlham Əliyevin həyata keçirdiyi siyasi kursu daim dəstəkləyir.

Əziz İsmayılov xüsusilə vurğulayıb ki, Vətənimizin ərazi bütövlüyü və torpaqlarımızın azadlığı uğrunda canlarını fəda etmiş şəhidlərimizin ailələri cəmiyyətimizin ən dəyərli əmanətləridir. O qeyd edib ki, qazilərimiz isə şanlı tariximizin canlı şahidləri olmaqla yanaşı, xalqımızın qəhrəmanlıq simvoludurlar.

"Şəhid ailələrinin və qazilərimizin yanında olmaq hər birimizin mənəvi borcudur. Onların problemləri ilə yaxından maraqlanmaq, qayğılarını bölüşmək və hər zaman dəstək göstərmək fəaliyyətimizin prioritet istiqamətlərindən olacaq", – deyə Əziz İsmayılov bildirib.

O həmçinin qeyd edib ki, hazırda "Vətənə Xidmət" İctimai Birliyi dövlət qeydiyyatına alınma mərhələsindədir. Birliyin yaxın zamanda rəsmi qeydiyyatdan keçərək fəaliyyətini daha geniş miqyasda davam etdirəcəyinə ümid etdiyini bildirib.

Əziz İsmayılov sonda vurğulayıb ki, təşkilatın əsas məqsədi dövlətçiliyə xidmət etmək, vətənpərvərlik ideyalarını təbliğ etmək, şəhid ailələri və qazilərə mənəvi dəstək göstərmək, eləcə də cəmiyyətin inkişafına töhfə verməkdir.

Mənbə: RealMedia.info
31.05.2026
Bakı şəhəri.