Ukraynalı uşaqların daha bir qrupu psixoloji və sağlamlıq reabilitasiyası məqsədilə Azərbaycana gəlib.

Realmedia.info xəbər verir ki, bu barədə Ukraynanın Azərbaycandakı səfiri Yuri Qusev feysbuk hesabında paylaşım edib.

Səfir bildirib ki, bu il ölkəyə reabilitasiya üçün gələn üçüncü qrup 29 ukraynalı uşaq və 3 müşayiətçidən ibarətdir. Uşaqlar Çerniqov vilayətində yerləşən İvanovo Liseyinin şagirdləridir.

Onlar Bakı şəhərində Heydər Əliyev Beynəlxalq Aeroportunda Ukrayna diplomatik nümayəndəliyinin əməkdaşları və Milli Məclisin Azərbaycan–Ukrayna parlamentlərarası əlaqələr üzrə İşçi Qrupunun sədri Əlibala Məhərrəmzadə tərəfindən qarşılanıblar.

Yuri Qusev qeyd edib ki, bu səfər uşaqlara peşəkar tibbi və psixoloji dəstək almaq, həmçinin təhlükəsiz mühitdə bərpa prosesi keçmək imkanı yaradır.

Diplomat əlavə edib ki, Rusiya–Ukrayna müharibəsi başlayandan bu günədək ümumilikdə 545 ukraynalı uşaq Azərbaycanda müalicə və reabilitasiya xidməti alıb.

“Bu, təkcə rəqəmlər deyil, xalqlarımız arasında həmrəyliyin, dostluğun və qarşılıqlı dəstəyin göstəricisidir. Azərbaycan rəhbərliyinə və xalqına dərin təşəkkürümüzü bildiririk”, – deyə səfir vurğulayıb.