Azərbaycanda ürək transplantasiyasına ehtiyacı olan vətəndaşların sayı kifayət qədər çoxdur.

Realmedia.info APA-ya istinadən xəbər verir ki, bunu Milli Məclisin Səhiyyə komitəsinin sədri, akademik Əhliman Əmiraslanov “Qafqazda ilk ürək transplantasiyası: Azərbaycan səhiyyəsinin tarixi nailiyyəti və gələcək perspektivlər” mövzusunda keçirilən dəyirmi masa zamanı deyib.

Akademik bildirib ki, Azərbaycanda ilk ürək transplantasiyasının həyata keçirilməsi səhiyyə sisteminin inkişafı baxımından mühüm tarixi hadisədir və bu sahədə yeni imkanların açılmasına zəmin yaradır. Onun sözlərinə görə, transplantasiya sahəsinin genişlənməsi üçün donor sayının artırılması xüsusi əhəmiyyət daşıyır.

Tədbirdə çıxış edən ilk ürək transplantasiyası olunan şəxs isə səhhətinin yaxşı olduğunu qeyd edərək hər kəsi orqan donorluğuna müsbət yanaşmağa çağırıb:
“Əməliyyat uğurla icra edildi, hazırda səhhətim yaxşıdır, heç bir problemim yoxdur. İnsanlar donorluqdan çəkinməməli, rahatlıqla bu imkandan faydalana bilərlər”, – deyə o vurğulayıb.