Prezident Administrasiyasının rəhbəri Samir Nuriyev ümummilli lider Heydar Aliyevin anadan olmasının 103-cü ildönümü ilə bağlı məqalə yayımlayıb.

Məqalədə bildirilib ki, Prezident Ilham Aliyevin sərəncamı ilə 2026-cı ilin Azərbaycanda “Şəhərsalma və Memarlıq İli” elan olunması ölkədə bu sahənin inkişafına verilən önəmin göstəricisidir.

Samir Nuriyev qeyd edib ki, Heydər Əliyev yalnız siyasi lider deyil, həm də müasir Azərbaycanın qurucusu, dövlətçilik ənənələrinin memarı olub. Onun rəhbərliyi dövründə ölkədə güclü sənaye infrastrukturu yaradılıb, şəhərsalma siyasəti sistemli şəkildə həyata keçirilib, Bakı və bölgələrin siması dəyişib.

Məqalədə vurğulanıb ki, 1969-1982-ci illərdə Azərbaycanda yüzlərlə sənaye müəssisəsi istifadəyə verilib, yeni yaşayış massivləri salınıb, yollar, parklar, mədəniyyət və sosial obyektlər tikilib. Həmin dövrdə Bakı şəhərinin Baş planı yenilənib, metro infrastrukturu genişləndirilib, İçərişəhər, Şuşa, Şəki və Ordubad qoruq elan olunub.

Prezident Administrasiyasının rəhbəri bildirib ki, müstəqilliyin ilk illərində ölkədə yaranmış ağır böhran Heydər Əliyevin hakimiyyətə qayıdışından sonra aradan qaldırılıb. Onun rəhbərliyi ilə ictimai-siyasi sabitlik təmin olunub, iqtisadi islahatlar həyata keçirilib və Azərbaycanın inkişaf strategiyasının təməli qoyulub.

Məqalədə qeyd olunub ki, Prezident İlham Əliyevin rəhbərliyi dövründə bu siyasət uğurla davam etdirilib. Bakıda və regionlarda müasir infrastruktur layihələri həyata keçirilib, yeni parklar, yollar, sosial obyektlər, yaşayış kompleksləri salınıb.

Samir Nuriyev işğaldan azad olunmuş ərazilərdə aparılan genişmiqyaslı quruculuq işlərinə də toxunub. Bildirib ki, Qarabağ və Şərqi Zəngəzurda həyata keçirilən layihələr müasir şəhərsalma modelinin nümunəsidir. Hazırda həmin ərazilərdə şəhərlərin baş planları hazırlanıb, hava limanları, yollar, tunellər və yaşayış məntəqələri inşa edilir.

Məqalənin sonunda vurğulanıb ki, Heydər Əliyev dağılmaq təhlükəsi ilə üzləşən Azərbaycanı yenidən qurub, Prezident İlham Əliyev isə həmin siyasi kursu davam etdirərək ölkəni qüdrətli dövlətə çevirib.