Baş nazir Əli Əsədovun imzaladığı qərara əsasən, Elm və Təhsil Nazirliyinin tabeliyində olan İdarəetmə Sistemləri İnstitutu və Riyaziyyat və Mexanika İnstitutu ləğv edilərək, onların bazasında vahid Riyaziyyat İnstitutu yaradılıb. Yeni yaradılan instituta direktor əvəzi vəzifəsinə texnika elmləri doktoru Elxan Səbziyev təyin edilib.

Bu dəyişikliklə əlaqədar olaraq, ləğv edilən Riyaziyyat və Mexanika İnstitutunun direktoru, sabiq təhsil naziri Misir Mərdanov vəzifəsini itirib.
Sabiq nazir gələcək fəaliyyəti ilə bağlı Modern.az saytına açıqlamasında bildirib ki, elmi və pedaqoji fəaliyyətini davam etdirəcək:
“Mən Bakı Dövlət Universitetində Ali riyaziyyat kafedrasının müdiriyəm. Planlarım kifayət qədər genişdir. Elmi tədqiqatlarımı, eləcə də riyaziyyatın tədrisi metodikası istiqamətində işlərimi davam etdirəcəyəm. Bununla yanaşı, ölkəmizdə və beynəlxalq aləmdə yüksək nüfuza malik olan, baş redaktoru olduğum AMEA Riyaziyyat və Mexanika İnstitutunun ‘Elmi əsərlər’ jurnalının fəaliyyətinə rəhbərliyimi də davam etdirəcəyəm. Görüləsi işlər çoxdur, əsas odur ki, Allah can sağlığı versin”.

Qeyd edək ki, Misir Mərdanov uzun illər elm və təhsil sahəsində müxtəlif məsul vəzifələrdə çalışıb və hazırda akademik fəaliyyətini Bakı Dövlət Universitetində davam etdirir.