Mingəçevirdə özünü Antiterror əməliyyatında şəhid olmuş hərbçinin xanımı kimi təqdim edən qadının dələduzluğu üzə çıxıb.
Realmedia xəbər verir ki, Mingəçevir sakini, 1987-ci il təvəllüdlü Rəsmiyyə Kazımova həmcinsi olan Afət Nəsibovanı aldadaraq ondan 22 min 500 manat pul alıb.
Məlumata görə, Rəsmiyyə Kazımova Bərdə rayonundan olan və adının çəkilməsini istəmədiyimiz bir şəhidin Mingəçevirdə tanınmayacağını düşünərək bu şəhərdə yaşayan Afət Nəsibovanın etibarını qazanıb. O, özünü şəhid xanımı kimi təqdim edərək dövlət tərəfindən ona Mingəçevir şəhəri, Qələbə dairəsi yaxınlığında dəyəri 80 min manat olan mənzil veriləcəyini bildirib.
Daha sonra qadına həmin mənzili təxminən 20 min manat ödəniş qarşılığında Afət Nəsibovanın qızının adına keçirə biləcəyini deyib və pulu sənədləşmə xərcləri üçün aldığını bildirib. Afət Nəsibova deyilənlərə inanaraq tələb olunan məbləği ödəyib.
Rəsmiyyə Kazımova bu barədə heç kimə məlumat verilməməsini tapşırıb. Şübhə yaranmaması üçün isə bazardan aldığı adi bir kilidi “evin açarı” kimi təqdim edib və açılış olmamış mənzilə köçməyin qadağan olduğunu deyib.
Etibarı qorumaq məqsədilə o, “WhatsApp”da şəhid xanımı olduğunu əks etdirən paylaşımlar edib və şəhidin fotolarını status bölməsində yayımlayıb. Maraqlıdır ki, bu paylaşımlar yalnız Afət Nəsibovaya açıq olub.
Rəsmiyyə Kazımova məhkəmədə əməlindən peşman olduğunu bildirib və zərərçəkmişlə barışıq əldə edildiyini, dəymiş ziyanın ödənilməsi barədə razılaşma imzalandığını qeyd edib.
Məhkəmənin hökmü ilə Rəsmiyyə Kazımovanın azadlığı 5 ay 18 gün müddətinə məhdudlaşdırılıb.